Naayijeeriyaatti hojjettoonni qonnaa 'akka hin malletti' ajjeefaman


Ajjeechaa Dilbata yoo xiqaate hojjettoota humnaa 43 irratti Kaaba Baha Naayijeeriyaatti raawwate pireezidantiin biyyattii ajjeechaa 'akka hin malletti' raawwatame jechuun ibsan.

Kanneen ajjeechaa kana kan raawwatan hojjettoota humnaa kanneen erga hidhanii booda gorra'anii ajjeesan.

Ajjeechaan kun Kaaba Baha Naayijeeriyaa magaalaa guddoo kutaa biyyaa Boornoo kan taate Maayiduguri keessatti raawwate.

Kutaa biyyaa kana keessa gareen Bokoo Haraam kan amantaa Islaamaa fiinxaleessuun beekamu keessa socho'u yoo ta'u, haleellaawwan akkanaa amma duras raawwatamaa ture.

Ajjeechaa Dilbataa kanaaf qaamni itti gaafatamummaa fudhate hin jiru.

"Ajjeechaa shororkeessitootaan qonnaan bultoota keenyarratti raawwatame nan balaaleffadha. Biyyi guutuun ajjeechaa hiikaa hin qabne kanaan miidhameera. Yeroo gaddaa kanatti yaadni koo maatii warra ajjeefamanii waliin, warri du'an nagaan haa boqotan," jedhan pireezidant Buhaariin.

Reeffi namoota ajjeefamanii 43, hundi isaanii kan gorra'amani argamuu fi namoonni jaha ammoo akka malee miidhamuu hidhataan naannichaa tokko AFPtti himeera.

Namoonni jaha biroo ammoo butamuu hin oolle jedhamee yaadama.Kanneen ajjeefaman kutaa biyyaa Sokotoo jedhamu kan Kaaba Lixa Naayijeeriyaatti argamurraa dhufan yoo ta'an, kiiloomeetira 1000 imaluun hojii barbaacha lafa itti ajjeefaman dhaquu hima milishaan kun.

Qonnaan bultoonni kunneen kan ajjeefaman Jimaata darbe hidhataa Bokoo Haraam tokko qawwee irraa hiikanii to'annoo jala oolchuu isaaniitiin akka ta'e barruun biyyatti tokko gabaaseera.

Amma durallee qonnaan bultoonni waarana biyyattiif odeeffannoo kennu jedhamuun Bokoo Haraamiin haleelamaa turuu himu gabaasaaleen.

Ji'a darbe loltoonni Bokoo Haraam qonnaan bultoota 22 ajjeesaniiru.

Kutaalee biyyaa Kaaba Naayijeeriyaa keessa kan socho'u Bokoo Haraam tarree gareelee shororkeessitootaa US keessa bara 2013 tarreeffame.

Afaan Hawusaatiin Bokoo Haraam jechuun "Barnoonni warra lixaa haraama ykn dhorkamaadha" akka jechuuti.