ዛሬ 4 ሰዎችን አሳፍሮ ከድሬድዋ ወደ ጅግጅጋ ሲጓዝ የነበረ ET-AMl መለስተኛ አውሮፕላን በምስራቅ ሀረርጌ ዞን ኮምቦልቻ ወረዳ ዛሬ ወደቀ፡፡

በፕሌኑ ውስጥ የነበሩ ሰዎች በህይወት መትረፋቸውም ታውቋል፡፡

አውሮፕላኑ ዛሬ ሐምሌ 20 ቀን 2013 ዓ/ም ከቀኑ 11:30 አካባቢ በኮምቦልቻ ወረዳ ቄረንሳ ጋረአሮ በተባለ ቦታ መውደቁን የወረዳው ኮሚኒኬሽን ጽህፈት ቤት ኃላፊ አቶ አብዲ ቡሽራ ተናግረዋል፡፡

ከተሳፋሪዎች መካከል በአንደኛው ተጓዝ ላይ መጠነኛ ጉዳት የደረሰበት በመሆኑ ወደ ድሬደዋ ለህክምና መላኩንም ገልጸዋል፡፡ ሌሎች ተጓዦች በመልካም ጤንነት ላይ መሆናቸውን በስፍራው ተገኝተው እንደተመለከቷቸው የገለጹት ኃላፊው በአካባቢው ያለው የአየር ሁኔታ ጭጋጋማ እንደነበረም ተናግረዋል፡፡

መረጃው የሐረማያ ዩኒቨርሲቲ ማኅበረሰብ ሬዲዮ ጣቢያ ነው።

የፌዴራል መንግስት "የሰብአዊ ዕርዳታ እንዲርደስ ለማስቻል አልሜ ያደረኩት የተናጠል የተኩስ አቁም በሕወሃት ትንኮሳ መደናቀፉን ቀጥሏል" ብሏል።

በትግራይ ክልል በሚገኙ መጋዘኖች ውስጥ ከ400,000 ኩንታል የሚበልጥ ስንዴ እና ከ2.5 ሚሊዮን ሊትር የሚበልጥ የምግብ ዘይት መቀመጡን አንስቷል።

የፌዴራል መንግስት ፥ "በትግራይ ክልል ያሉት ዜጎቻችን ደህንነት ያሳስበኛል" ያለ ሲሆን *ዓለም አቀፍ ድርጅቶች፣ በተለይም ደግሞ በትግራይ ድጋፍ በመስጠት ላይ የሚገኙት፣ ህወሓት የአፋርን ክልል መተናኮሱን አቁሞ ሰብዓዊ እርዳታ ለያዙ ተሽከርካሪዎች መንገዱን እንዲከፍት ግፊት ማሳደር አለባቸው" ብሏል።

ይህ መረጃ ይፋ የሆነው በ"ወቅታዊ ሁኔታ የመረጃ ማጣሪያ ገፅ" በኩል ነው።

ከሰዓታት በፊት የዓለም ምግብ ፕሮግራም ዋና ዳይሬክተር ዴቪድ ባስሌይ ድርጅታቸው ትግራይ ውስጥ የሚያደርሰው የምግብ ድጋፍ አቅርቦት በዚህ አርብ እንደሚያልቅበት ገልፀዋል።

ዴቪድ ባስሌይ በአፋር አካባቢ ስላለው ሁኔታ ዝርዝር መረጃዎች ባይሰጡም ለትግራይ ምግብ እና ሌሎች አስፈላጊ አቅርቦቶች የያዙ 170 ተሽከርካሪዎች በአሁን ሰዓት አፋር እንደሚገኙና መንቀሳቀስ እንዳልቻሉ ገልፀዋል።

ዋና ዳይሬክተሩ ፥ ተሽከርካሪዎች አሁኑኑ እንዲንቀሳቀሱ መፈቀድ እንዳለበት በመግለፅ ትግራይ ውስጥ ሰዎች እየተራቡ መሆኑን አሳውቀዋል።

በህገ ወጥ መንገድ ሲዘዋወር የነበረ ከ170 ሺህ በላይ የአሜሪካ ዶላር ከብሄራዊ መረጃ እና ደህንነት አገልግሎት ጋር በመቀናጀት በቁጥጥር ስር ማዋሉን የአዲስ አበባ ፖሊስ አስታወቀ፡፡

በህገ ወጥ መንገድ የአሜሪካ ዶላር ሲያዘዋውር የነበረው የሰሌዳ ቁጥር ኮድ 3-57949 ኢት/ተሳቢ 17713 ኢት የሆነ ከባድ ተሽከርካሪ ሲሆን በቁጥጥር ስር የዋለው ሃምሌ 7 ቀን 2013 ዓ/ም በአቃቂ ቃሊቲ ክፍለ ከተማ ወረዳ 9 ቱሉ ዲምቱ ተብሎ በሚጠራው አካባቢ ነው፡፡

የአዲስ አበባ ፖሊስ እንዳስታወቀው ተሽከርካሪው ከአዲስ አበባ ወደ ጅቡቲ እየተጓዘ ነበር ፤ ቁጥጥር ስር ከዋለ በኋላ በተደረገበት ፍተሻ ከጋቢናው መቀመጫ ወንበር ጀርባ በሚገኝ ሳጥን ውስጥ በላስቲክ ተጠቅልሎ የተደበቀ 170 ሺህ 700 የአሜሪካ ዶላር በቁጥጥር ስር ዉሏል፡፡

ከጉዳዩ ጋር በተገናኘ አንድ ተጠርጣሪ ተይዞ ምርመራው እየተከናወነ ይገኛል።

የአ/አ ፖሊስ በአሁኑ ወቅት ህገ-ወጥ የገንዘብ እንዲሁም የጦር መሳሪያ ዝውውር የሃገርን ሰላም እና የተረጋጋ ኢኮኖሚን በማናጋት በህዝብ ኑሮ ላይ የሚፈጥረው ቀውስ ከፍተኛ መሆኑን በመረዳት ህብረተሰቡ መረጃ እና ጥቆማ በመስጠት ለፀጥታ አካላት የሚያደርገውን ድጋፍ አጠናክሮ እንዲቀጥል ጥሪውን አቅርቧል።

የዓለም ምግብ ፕሮግራም ዋና ዳይሬክተር ዴቪድ ባስሌይ ፥ የዓለም ምግብ ፕሮግራም (WFP) ትግራይ ውስጥ የሚያደርሰው የምግብ ድጋፍ አቅርቦት በዚህ አርብ እንደሚያልቅበት ገለፁ።

የዓለም ምግብ ፕሮግራም (WFP) በትግራይ ውስጥ ሊመግብ ላሰባቸው ሰዎች ሁሉ ለመድረስ በቀን 100 የጭነት ተሽከርካሪዎች እንደሚያስፈልገው አንስተዋል።

ባስሌይ ፥ "ለትግራይ ምግብ እና ሌሎች አስፈላጊ አቅርቦቶች የያዙ 170 ተሽከርካሪዎች በአሁን ሰዓት አፋር ይገኛሉ፤ መንቀሳቀስም አልቻሉም ፤ አሁኑኑ እነዚህ ተሽከርካሪዎች እንዲንቀሳቀሱ መፈቀድ አለበት ፤ ሰዎች እየተራቡ ነው" ብለዋል።

በሳዑዲ አረቢያ ባሉ ዜጎቻችን ላይ የሚፈፀመውን በደል የሚቃወም ሰል በአሜሪካ ተደረገ።

በአሜሪካን ሃገር የሚኖሩ ኢትዮጵያውያንና ትውልደ ኢትዮጵያውያን በሳኡዲ አረቢያ በኢትዮጵያዊያን ላይ እየተፈጸመ ያለውን የሰብአዊ መብት ጥሰት መበቃወም ሰልፍ ወጥተዋል።

በአሜሪካን ሃገር በሚኖሩ ኢትዮጵያውያንና ትውልደ ኢትዮጵያውያን የተቋቋመው በኢትዮጵያ ዓለም አቀፍ የወጣቶች ህብረት አስተባባሪነት በሳኡዲ አረቢያ በኢትዮጵያዊያን ላይ እየተፈጸመ ያለውን የሰብአዊ መብት ጥሰት መበቃወም በዋሽንግተን የሳኡዲ አረቢያ ኤምባሲ ፊት ለፊት ሰልፍ ወጥተው ድምፃቸው አሰምተዋል።

ሰልፈኞቹ ባስተላለፉት መልዕክት ‘በኢትዮጵያውያን ላይ እየተፈጸመ ያለው የሰብአዊ መብት ጥሰት እንዲቆም' ጠይቀዋል፤ ‘ሕጻናትና ሴቶች ጥበቃን እንጂ የመብት ጥሰትን አይፈልጉም' ብለዋል።

ሰልፈኞቹ 'በሳዑዲ አረቢያ የሚገኙ ኢትዮጵያውያን እየደረሰባቸው ያለው በደልና ግፍ አይገባቸውም' ብለዋል።

በሳዑዲ አረቢያ የሚኖሩ ኢትዮጵያውያን "ሥቃያቸው ፣ እንግልታቸው እና መከራቸው እየበዛ መሆኑን ሪፖርት እያሰረጉ ይገኛሉ።

ሕፃናት እየሞቱባቸው እንደሆነ ፣ እህት ወንድሞቻቸውም እየተሰቃዩ እንደሆነ፣ ነፍሰ ጡር ሴቶች እየተሰቃዩ እንደሆነ እያሳወቁ ይገኛሉ።

መረጃው ከኢትዮጵያ ዳያስፓራ ኤጀንሲ እና የጀርመን ድምፅ ሬድዮ የተገኘ ነው።